Con a publicazión d'o Decreto de Nueba Planda o diya 24 chunio 1707 o estatus churidico y politico de Cosuenda chira de raso y s'adibe a lo que güei conoxemos como lo Estau Español Muderno, anque a guerra contina dica 1714.

 

Mapa de Fer de 1706

 

Asinas ta 1708 "la Unión de Labradores” alcuerda abonar a metá d'a balura d'a caballería que se tresbatiese con ocasión d'a guerra, siempre que no fuese por culpa suya y precurando no amanar-se a más de cuatro leguas a l'armada, remeyando d'ista traza un gran mal t'os cosuendanos, pues asobén pasaban amán os exerzitos belixerans, y s'apoderaban de cuantas caballerías trababan causando asinas enorme perchuizio t'os agricultors. Ta 1709 a poblazión bi ye de 120 bezins u casas.

 

Mapa de Nolin de 1709

 

O 3 d'abril de 1711, por un Reyal Decreto, Zelipe V debide l'antigo Reino d'Aragón en 13 Correximientos, Cosuenda queda enclusa en lo de Daroca, que conzide casi de raso con as güegas d'a Bereda de Daroca.

 

Os Correximientos (1711)

 

Ta 1712 falleze en Zaragoza qui eba estau Bicario de Cosuenda Mosen José Torres Busal, estando apedecau en a Ilesia San Pablo d'ista zidá. Ta l'año siguién se fa o retablo d'a Nuestra Siñora d'o Rosario, bosando-lo a suya Clofaria, por a construzión y tallau 200 libras chaquesas y, por dorar-lo, 280, estando lo millor de toz os retablos d'a Ilesia, con agundanzia de talla, suelta y muito bien conclusa, y con un dorau rico y remanén.

 

O Retablo d'a Birchen d'o Rosario (1713)