A iste recorriu li dizimos a Ruta de "la Unión" porque mos lebará a conoxer, alto u baxo, a parti d'o Lugar que s'empezipió a edificar cuan o rezinto meyebal estió insufizién ta acubillar a esplosión demografica que sennificó en Cosuenda "el Tratado de la Unión", en lo cualo se chunión ta 1647 barios labradors, mercando machos, campos, ezetra... ta dimpués arrendar-los ta "los unidos", y sennificó una crexedura de poblazión de 71 casas que bi eba ta 1646 ta 120 ta 1709 y ta 300 ta 1771.
Esquema d'a Ruta de "la Unión". Pulsia astí ta beyer o Plano toristico de Cosuenda (Bersión en castellán)
Dito ísto empezipiamos, como en totas istas rutas, en “la Plaza’l Mercau” [1], ufizialmén Plaza de España y que como ya emos dito en a Ruta Meyebal empezipió estando un chicot fosal, “el Fosal de San Juan” y estió urbanizada en o sieglo XVI ta azoque y en iste tiempo tamién se cheneralizan en iste puesto as execuzions publicas, ya que yera o puesto más amplo y cabeba muita chen.
“La
Plaza’l Mercáu” ta 1950
En “la Plaza’l Mercau” encara podemos apreziar l'antiga posada, d'o sieglo XVI, y bel ráfel tradizional en as casas, antimás de poder-mos prexinar do agora se troba “la Casa Lugar”, o edifizio amariello que fa de siede t'o Conzello, l'antiga armita de San Chuan que en ixe tiempo estió cuan luzió a suya masima esplendor, dica que se construyó a ilesia nueba ta 1686.
“La Posada”
Tamién tenemos os muros d'esfensa d'o río con os alazez orichinals d'os finals d'o sieglo XVII, no asinas o tapial, estricallau barias bezes por o río, y un chicot puen piatonal, “el Puente la Plaza”, racada de lo primer, d'os finals d'o sieglo XVII tamién.
“El Puente la Plaza” ta 1890
Mos colocamos chusto ta l'atra estrimera de “la Casa Lugar”, an dentra “la Carretera”, ufizialmén Paseo de Don Fermín Gutiérrez Muro, parti antis zarrada de “la Plaza’l Mercáu” y ubierta t'os prenzipios d'o sieglo XX, cuan se construyó a carretera que da azeso ta Cosuenda.
“La Casa la Plaza” ta 1890
Continamos por ísta a la güembra d'os plataners apreziando bella casa t'a man dreita con zierta balura urbanistica.
