Iste recorriu mos lebará a conoxer a parti más antiga d’o lugar, cosa que ye difízil d’apreziar por as continas reformas que han endurau as casas mientres o tiempo pero encara quedan detalles que mos pueden abstrayer t’os tiempos meyebals, tiempos que en o nuestro Lugar empezipian ta l’año 1363, anque a nuestra primer decumentazión data de 1142. Estará difízil trobar racadas anteriors ta ixe año pues o Lugar estió estricallau de raso por a imbasión de Castiella y abió que reconstruir-lo.

 

Esquema d’a Ruta Meyebal. Pulsia astí ta beyer o Plano toristico de Cosuenda (Bersión en castellán)

 

Asinas que enzetamos o nuestro camín en “la Plaza’l Mercau” (Plaza de España) [1], antis más “Fosal de San Juan” y urbanizada en o sieglo XVI t’o mercau a l’aire libre y t’as execuzions publicas, estando iste puesto más amplo y cabendo muita chen.

 

“La Plaza’l Mercáu” en 1950

 

En ella podemos apreziar l’antiga posada y bel ráfel tradizional en as casas, antimás de poder-mos prexinar an agora se troba “la Casa Lugar”, l’edifizio amariello, l’antiga armita San Chuan, edifizio restaurau ta 1986, y que, anque agora no tienga muita balura arquiteutonico, si que en tiene prou istorica ta nusatros.

 

“La Posada”

 

Ista armita s’allenó a la Reutoría de Cosuenda en a Desamortizazión de Mendizábal de 1836, pasando a estar garchola, escuelas, torils y, de zaguero, siede d’o Conzello. As parez d’ista armita  yeran prou simplas y las remataba un chicot zimbalet que yera denzima d’a puerta. Dentro teneba tres altars: lo zentral, adedicau ta San Cuan Ebanchelista, de lienzo, lo d’o costau de l’epistola, con una imachen d’a Nuestra Siñora, d’escultura dorada, y ta l’atro costau un cuadro sobre tabla ripresentando a Santa Ana y una escultura de San Colás. En iste puesto se supone que continan as restas de Mosen Pablo Romeo, promotor de “El Tratado de la Unión”, pues estió apedecau en ista armita o 3 d’otubre 1672.

 

“La Casa Lugar”, do antis más yera l’Armita San Chuan