Lo primero ye amenistable dizir que por a manca d’a decumentazión istorica no podemos fablar de Cosuenda como tal dica 1142, que ye a suya primer menzión, en os Fueros de Daroca, si no contamos a zita d’Al-Udri en o sieglo XI dizindo-la Quswilda, por lo que no mos queda atro remeyo en iste capetulo que tener que fablar de suposizions istoricas, puesto que mancamos d’a calendata d’establimiento, y definir Cosuenda como “a zona” dica l’año 714, plegada d’a imbasión musulmana ta istas tierras, y de 714 ta 1119 como “Quswilda” calendata de l’adibidura d’ísta en o Reino d’Aragón. Asinas que con istas aclarazions imos entabán.
Conoxemos a poblazión d’a zona ya en a Edá de Bronze por os nuclios de silecs que s’han trobau en os lugars d’arredol, anque istos trobos son sueltos y no pueden dar razón a o establimiento de nuclios sedentarios. Sobre l’año 1700 a.C. se atribuyen bellas estrals en os arredols de Cariñena (La Bega) y un microburil en l’Aldegüela de Santa Cruz, en a bal d’o Griu. D’arte rupestre lo más amán conoxiu dica agora están os conchuntos de Zerro Felío y d'el Barranco'l Mortero en Alacón y de beluna que atra muestra en Lumpiaque. Sobre as trazas d’apedecadura esisten en espelungas, en Calzena y en Torriello d’a Cañada, baxo roca en os arredols de Calatayú y en fuesa tumular en a Mezquita de Loscos. Ístos datos mos pueden dar una chicota ideya d’a bida d’os primers abitadors d’a zona.
Ya sobre l’año 1000 a.C. se puede fablar de trobos en Muel, Alfamén, Longars, Billanueba d’a Uerba, Aguilón, Langa, Mainar, Billareyal d’a Uerba, lo que mos da una densidá de poblazión superior y sobre tot un siñal de sedentarismo en a zona.
Mientres a Primer Edá de Fierro ya se fabla d’una berdadera cultura en a Bal Meya de l’Ebro, que abracaría dica la zona, con poblaus en Muel y Billanueba d’a Uerba y necropolis en Epila, situgaus en tozals. Sobre o 500 a.C. ya se puede fablar de pueblos en a zona como los sedetans, os lusons y os belaiscos u belos trobando-se Cosuenda en a muga imaxinaria d’ístos dos zaguers. Rezentan as cronicas que bestían, antimás d’atros bestuaches, con un calzón curto y unas meyas, que parixe estar o enzete d’a nuestra bestimenta tradizional, y que s’alimentaban con carnes y bins mezclaus con miel. Istos pueblos s’apedecaban en necropolis y plegón a esistir berdaderas ziudaz en a zona con Nertobriga, entre l’Almunia, Calatorau y Ricla, an se cudizian monedas con l’alfabeto iberico.
Muitos istoriadors dan sobre o sieglo III a.C. l’orixen aparén d’os biñers en a zona, anque se creye que son muito más antigos. Ta l’año 197 a.C. ya podemos empezipiar a fablar de romanizazión puesto que se troba la zona en a Ispania Ziterior, anque ísta siempre estará más platera en a bal d’o Xalón y en a d’a Uerba, con “Villae” en Calatorau, l’Almunia u Muel, quedando Cosuenda como una isla pero sin plegar t’a marguinalidá d’os Perinés u d’a Sierra Gúdar.
En ista puenda se troban necropolis romanas en Paniza, en Muel y en Calatorau, y dos Bías Romanas prenzipals trabiesan a zona, la d’Emerita Augusta ta Caesar Augusta y la de Lamino ta Caesar Augusta. Seguntes Traggia, os abitadors d’ixe tiempo fablaban de bin "negro" en cuenta de tinto y d’o bin blanco. Ta que no se lis malmetiese li adibiban produtos muito bariaus, como lo cheso y a pegunta. Como encara no se conoxeba l’amasegada en pipa, que estió un imbento galo, se conserbaba o bin en unas granizas tenallas, ditas dolías, do quedaba dica estar embasau t’a benda u transporte en xarras y en anforas con trazas d’azanoria, capables cadaguna d’una meya de 26 litros. O bin se bebeba en copas amplas de poca afondadura, ta fazilitar una zaguera decantazión y yera apreziau por as suyas bertuz sicotropicas y merezinals, antimás d’apañar platos dibersos, emplegar-se como remeyo ta mals de fonsera, bexiga, ziatica y atros y beber-se porque daba calor y alimentaba, como dica cuasi l’autualidá, más que por plazer gastronomico.
Ta l’año 27 a.C., con a creyazión de Caesar Augusta s’adibe a zona t'o Combento Churidico Caesaraugustano, drento d’a Probinzia d’a Ispania Ziterior Tarraconensis.
Sobre a metá d’o sieglo I, seguntes Cheromo de San Chusé, s’ebancheliza la zona y se creya la Siede Episcopal de Cariñena, y ta l’año 103, seguntes a Cronica d’Auberto, ye bispe San Aradiziano. En a segunda metá d’o sieglo III se treslada ista Siede ta Leida, pertenexendo a zona ta lo de Zaragoza.
Ta l’año 293 se reyaliza la reforma pulitica de Diocleziano y a zona contina pertenexendo t’a probinzia Tarraconensis. A prenzipios d’o sieglo V as imbasions besigodas son ya un feito, s’ubre una puenda fosca en a istoria, puesto que nomás conoxemos que ta l’año 586 o Reino Besigodo se trestalla en probinzias y a zona queda encuadrada en la d’Iberia, y que t’os prenzipios d’o sieglo VIII a zona yera enclabada en o Territoria Caesaraugustanum.
T’a primabera de l’año 714 Cosuenda s’adibe en o nuebo orden musulmán, por Musa ibn Nusayr, pertenexendo t’a Marca Superior y t’o Destrito de Saracosta. Se prexina que a poblazión debeba continar estando a mesma pues alpenas esistió colonizazión umana y se rispetó l’antiga relixión d’os abitadors ta qui quiso u se combirtión a l’Islamismo, pero en Cosuenda no sapemos con zertitú lo que alcurrió anque por a suya situgazión difuera de bal ampla y zona de comunicazión creyemos que os suyos abitadors continón con a suya luenga mozarabe y relixión cristiana pasando a o basallache de lugars como Almonazí que sí que se combirtió.
T’os meyaus d’o sieglo VIII se reyaliza la trestalladura en Qoras. Quswilda ye en la d’Arth y ta l’año 852 t’o 862 pertenexe t’os dominios d’os Banu Qasi. Ta l’año 873, dimpués d’una campaña emiral que pasa por o lugar, caye en dominio d’os tuyibís. Ta l’año 935 una azeifa d’Abdarrahman III pasa por Quswilda.
T’o sieglo XI Al-Udri en as suyas descrizions zita Quswilda. Ísta pasa a estar parti d’a Taifa Uidí de Saracosta (Reino d’os Banu Ud) y ta l’año 1110 pasa t’o dominio d’os almorabides.
Ta rematar, dizir que ta l’año 1119 Alifonso I d’Aragón adibe Quswilda t’o suyo reino.
Cosuenda en o Reino d’Aragón (1119-1707)
Cosuenda en o Estau Español Muderno (1707-1936)