Escomezipiamos iste capetulo en 1119 con a  adibidura de Quswilda t’o Reino d’Aragón por parti d'o rei  Alifonso I. En prenzipio tambén s’adibe t’o Bispau de Sigüenza.

Asinas en 1121 se produze a Baralla de Cutanda, amán de Calamocha, que ubre os camins d’o Sur y asegura las tierras ya adibidas. Por ixo Alifonso I de Aragón conzede, entre atros lugars, a Cosuenda la Carta Puebla en 1125, y repuebla o lugar con biarneses y bigordans y en menor parti con nabarros y montañeses aragoneses.

En 1127 Cosuenda dentra, dica os nuestros diyas, en o Bispau de Zaragoza, Arzebispau dende 1318.

 

Ta l’año 1132 Remiro II d’Aragón atorga os primers Fueros de Daroca y en 1142 Ramón Berenguer IV de Barzelona y Prenzipe d’Aragón esbiella os Fueros de Daroca atorgaus por o  suyo suegro d’a siguién traza:

"Ego, comes Raymundus Barcilonensis et princeps Aragone, concedo et otorgo istam cartam et istum forum et quidquid boni invenerint de his decem annis et do illis istos terminos de Vila Feliç ad Altea, a Cemballe, a Cubedo, a Cubillego, a Zafra, a Rodenas, a Sancta Maria , a Castiell Sauib, a Demuz, a Serreilla, ad Alpont, a la Cirab, a Tor Alba, a Montan, a Linares, a Rio de Martin, ad Vesa, a Fonte de Tossos, a Villa Nova, a Longares, a Cosuelda, a Codo, a Miedes, istas prenominatas cum suis terminis. Sunt testes: Lop Lopet, Artal, Arpa, Fortun Aztenaret, Garcia sanz de Vesa, Deus Adiuda, Pedro Martin, señior de Almaçan, Analdus Estopa [nnan], Guillen de [Sobirat] Berenguer de Barcilone, Mir de Luçan, Fortun Garces, maiordomo, Ernes Sanç de Siarç. Sancius Enegones, senior de Daroca, Bernardus, episcopus Cesaraugustanus. Dominante comité Raimundo in Barcilona et in Aragona et in Cesaraugusta. Regnante imperatore Leonis in Toleto et in Soria et in Calaforra et in tota Castella. Facta carta mense novembris, era M C LXXXª.

S [signo] Raimundi Comes. Signum regis [signo] Ildefonsi.

Qui voluerit corrumpere hanc cartam vel confringere rupta sint viscera eius et veniat super illum maledictio Dei et Sante Marie [et omnium ] sanctorum [et sit] male dictus et anatematizatus cum Juda traditore et cum Datam et Abiron in inferno habeat mansionem. Amen.”

Que sennifica: “Yo, Ramón, conde de Barzelona y prenzipe d’Aragón, atorgo ista carta e istos fueros y cualsiquier bien que aigan alquiriu dende fa diez años y lis doi istas albalas de Billafefeliche t’Ateya, ta Zimballa, ta Cubel, ta Cubeliello, ta Zafra, ta Rodenas, ta Santa María d’Albarrazín, ta Castelfabí, t’Ademuz, ta Serriella, t’Alpuén, ta Zirá, ta Torralba, ta Montón, ta Linars, ta Martín d’o Río, ta Uesa, ta Tosos, ta Billanueba, ta Longars, ta Cosuenda, ta Codos, ta Miedes istos lugars siñalaus y as suyas albalas. Son testigos: Lope López, Artal, Arpa, Fortún Aznar, Garzía Sanz de Besa, con l’aduya de Dios, Pietro Martín, siñor d’Almazán, Arnaldo Estopiñán, Guillén de Sobirat, Berenguer de Barzelona, Mir de Luzán, Fortún Garzés, mayordomo, Enego Sanz de Siare, Sancho Eneguez, siñor de Daroca, Bernardo, bispe de Zaragoza. Mandando lo conde Ramón en Barzelona, en Aragón y en Zaragoza. Reinando lo emperador de Lión en Toledo, en Soria, en Calaforra y en toda Castiella. Feita la carta en o mes de nobiembre de l’año 1142.

Sinno d’o conde Ramón. Sinno d’o rei Alifonso.

Si bella presona quisiesa azetar u estricallar ista carta sigan tronzadas as suyas coradas y bienga sobre él o maldau de Dios y de Santa María y de toz os Santos y siga maldau y anatematizau como Chudas o traidor y con Satán y Abirón tienga la suya estacha en l’infierno, Amén.”

T’os prenzipios dó siglo XIII a l’endrezar-se de Zaragoza ta Balenzia o rei Don Chaime I d’Aragón fa nuei en Cariñena, pernuitando os suyos arquers en Cosuenda. Ta ixe tiempo se trestalla o Reino en Merinaus y Bailius. Cosuenda ye en lo de Daroca.

 

Ta 1242 a organizazión d’a Comunidá d’Aldeyas de Daroca ye un feito, Chaime I d’Aragón premite a las aldeyas as suyas riunions por deseparau d’a billa y sin presenzia d’os suyos ripresentans. Iste auto y atros dica 1271 suponen o establimiento d’a Comunidá. Ísta yera un berdadero estau drento d’atro pues, alazetando-se en os Fueros de 1142, establió los suyos propios organs de gubierno, con os suyos ufizials que se riunían en plegas, teneba ripresentazión en as Cortes por deseparau d’a Billa.

 

Ta l’año 1256 Chaime I d’Aragón apreba la trestalladura d’a Comunidá d’Aldeyas de Daroca en 5 Sesmas, pertenexendo Cosuenda t’a d’o Campo Langa.

 

Ta 1291 Alifonso II d’Aragón otreya t’o Siñorío d’os Luna la billa d’Almonazí d’a Sierra, que dica ixe inte eba estada de reyalengo, como Cosuenda. T’os finals d’iste sieglo lo Reino se trestalla en Sobrechunterías. Cosuenda ye en la de Daroca.

Ta chunio de 1357 Pietro IV d’Aragón besita Cosuenda y preside o diya 30 as primers Cortes d’Aragón que s’imprimión, zelebradas en a Ilesia de Santa María en Cariñena. Pero lo 20 febrero de 1363 a guerra entre Aragón y Castiella plega ta Cosuenda, do se chuntan l’exerzito castellán y os refuerzes nimbiaus por Pietro IV d’Aragón. O lugar queda esboldregau de raso, asinas como Auguarón, Enzinacorba y Paniza. A poblazión s’acubilla en Cariñena. A guerra contina dica o 16 abril de 1363 cuan Pietro I de Castiella prene Cariñena, dimpués de dos meses de barallas en a redolada, y manda tallar as orellas, o naso y as mans a las presonas que i se trobaban, seguntes a tradizión popular.

 

Ta chulio de 1411 muere sin ereu Martín I d’Aragón. Don Antón de Luna, siñor d’Almonazí d’a Sierra, s’alía con o Conde d’Urchel, pretendién t’a Corona d’Aragón, y en istas tierras traman l’asasinato de l’Arzebispe de Zaragoza, Don Garzía Fernández d’Eredia, que repuntaba a Don Ferrando d’Antequera. L’asasinato s’estralía l’1 agosto, entre Ricla y L’Almunia de Doña Godina. Dimpués, a o salir eslexiu Don Ferrando en o Compromiso de Caspe como Rei, íste saca todas as riquezas d’os Luna, en Almonazí d’a Sierra, en fabor d’os Urreya, Condes d’Aranda, que sí que l’eban repuntau.

Ta 1463 Aragón se trestalla en 12 Sobrecullidas, trestalladura de carauter almenistratibo, a Comunidá d’Aldeyas de Daroca, y Cosuenda con ella, s’integra puliticamén en a Sobrecullida de Daroca.

 

O 2 de nobiembre 1495 os zensors de Ferrando II d’Aragón besitan Cosuenda, dando a suya besita la siguién rilazión:

SOBRECULLIDA DE DAROCA

COMISARIO: PEDRO CAPDEVILA, Ciudadano de Çaragoça

NOTARIO: FRANCISCO VILANOVA

 

COSUENDA

Aldea de Daroca

41 Fuegos

RVC: Hon. Mossen Miguel Thomas, JD: Domingo Bernabeu - Domingo Valles, TT: Anthon Aviego /a/, notario - Johan Serrano, escudero del comisario.

Mossen Miguel Thomas, vicario

Domingo Bernabeu

Berthomeu de Xorcas

Gonçalbo Lazaro

Domingo Julian

Miguel Quentin

Johan Vicent

Johan Castilla

Pero Riella

Johan Lorent

Anthon de Luecha

Johan Pelexero

Jayme Serrano

Pero Perez

Johan de Vergada

Domingo Cibrian

Johan Sancho

Johan Quentin

Johan Serrano

Pero Ferrandez

Martín d'Alegria

Johan de Luecha

Miguel Crabero

Johan Manso

Johan Crabero

Johan Pascual

Johan de Val

Pero Felipe

Miguel Ximeno

Anthon Climent

Simon de Segura

Anthon Royo

Pedro de Gurita, pelayre

Jayme Pardo

Johan de Lope

Blas de Langa

Simont Lazaro

Mingo Xarch

Domingo Valles

Pascual Ximeno

Mingo Naharro

 

O zenso de 1510 da ta Cosuenda una poblazión de 35 casas. Iste año asiste un ripresentán de Cosuenda t’a Plega d’a Comunidá de Daroca zelebrada en Billarreyal d’a Uerba. Ta l’año siguién asiste atro ripresentán de Cosuenda t’a Plega d’a Comunidá de Daroca zelebrada en Baguena.

O 14 febrero 1526 Carlos I d’Aragón ordena en tot o Reino a combersión d’os musulmans aragoneses t’o crestianismo, orden que parixe no tener balura en o nuestro lugar por a manca de decumentazión d’ístos, pero que reseñamos tarcual asinas por a importán poblazión flotán de relixión musulmana que sí que tenemos constanzia que yera en o lugar.

Ta 1528 asiste un ripresentán de Cosuenda t’a Plega d’a Comunidá de Daroca zelebrada en Romans. Poco dimpués o Reutor Mosen Exarcos empezipia os primers zinco libros conserbaus d’a ilesia .

O 18 chinero 1532 o besitador de l’Arzediozesis, en seu bacán por a muerte de l’Arzebispe Don Chuan d’Aragón, Mosen Francho Torrellas dize en o suyo decreto de besita pastoral: "Se troba o lugar de Cosuenda constituyiu por un nuclio de 45 u 50 bezins con os suyos Churaus t’o reximen zebil, o suyo chicot espital t’os anfermos y peteniadors, a suya ilesia parroquial situgada entalto y a suya armita erixida en unor a San Chuan". Con ísto lo Reutor Mosen Exarcos enzeta os zinco libros d’ista Parroquia, anque tot fa pensar que feba tiempo que funzionaba canonicamén porque o mesmo Siñor Torrellas fa menzión ta lo dispuesto en lo d’atras bisitas anteriors y nomás contando con que lebase muitos años s’esplanica la esistenzia d’o templo Parroquial con os suyos cuatro altars, l’armita de San Chuan con o suyo tetular y a casa Reutorial con as suyas zincas t’a dotazión antimás d’as premizias y os diezmos que se bosaban t’a mantenedura d’o culto.

Ta 1536 se zertifican un güerto y bellas olibas t’o culto de San Miguel.

Ta 1541 o zenso da ta Cosuenda una poblazión de 37 casas.

Sobre a metá d’o sieglo XVI datan os espertos a escritura d’un manuscrito alxamiau, en luenga de radiz latina (en iste caso aragonés con castellanismos) con carauters arabigos, en lo que o suyo transcritor parixe estar d’o nuestro Lugar, si se da fé a la siñadura posesiba que encabeza o codize, نخساعصثىيش طشلاي شممشا (Koshuwenda 'Abd Allâh), que sennifica “Abdalá de Cosuenda”, anque tamién podeba tener Cosuenda como apellido arabe pues en o zenso de 1495 en Alfamén tenemos  a Braez d’Alcosuende y a Alii d’Alcosuende. Iste manuscrito (Junta XXVI, fuellas d’a 31 t’a 84) que se conoxe como ثءفث ثء شمضعهفثلا ضعثءفش ثى ثم ثم ؤخىفخ يث يع م ؤشقىشهى (Exte ex alquiteb quextá en él el conto de Du-l-carnáin) que sennifica “Íste ye o libro que ye en él o computo d’Alexandro lo Manno” lo debeba emplegar iste tal Abdalá ta predezir o esdebenidero por meyo de l’astroloxía pues ba nunziando as birtuz y mancas de toz os sinnos d’o zodiaco.

Ta l’año 1559 se reconoxe y amullona l’Acampo de Cosuenda, “la Bobería”, por parti de os suyos comisarios, notarios y churaus d’o lugar.

Ta  1572 dentra Reutor en Cosuenda Mosen Jerónimo Miravete.

 

Ta 1578 besitan Cosuenda os alcompañans d’o rei Zelipe I d’Aragón. Rezentan as cronicas que lis clamó l’atenzión a riqueza y agundanzia d’os suyos mons, y que alufrón as bibiendas que trazaban o lugar, estando ístas arrocladas a o piet d’a Ilesia Parroquial y trazau o casco por as autuals “Serretas”, as cuestas de “los Narros”, de “l’Amargura” y de “l’Espital” y o callizo de “l’Olmo”, t’as que s’adibión en iste sieglo "la Calle Nueba” y “la Carrera Auguarón”, por l’aumento ta 74 casas ta 1578. Tamién s’urbaniza l’antigo “Fosal de San Chuan” ta zona de mercau a l’aire libre, la “Plaza’l Mercau”, y o casco sorbe l’armita de San Chuan, que yera en os arredols d’o lugar, an agora se troba "la Casa Lugar”.

Ista Armita teneba un zimbalet sobre a puerta y en l’interior tres altars: o zentral de lienzo dedicau t’o tetular San Chuan Ebanchelista, o d’o costau d’a epistola de talla con una imachen d’a Nuestra Señora d’escultura dorada, y a un costau un cuadro sobre fusta ripresentando a Santa Ana y una escultura de San Colás. As parez que zarraban o rezinto teneban una simpla ornamentazión.

 

A ilesia parroquial se trobaba denzima d’una chitota meseta. En a suya torre, l’autual “Lisalta”, eba dos campanas y dos zimbalez. Atro zimbalet más chicot yera penchau en un bentano d’o coro. En l’interior d’a ilesia eba cuatro altars, o zentral dedicau ta María Santisma y pintau sobre lienzo u fusta con un tabernaclo de fusta atrapaziau por cuatro colunnas torniadas y dos ánchels que lebaban os atrebutos d’a pasión. En o costau de l’Ebanchelio yera l’altar dedicau ta San Blas, pintau sobre lienzo. Más adebán yera l’altar de San Bernabé, tamién pintau, y de zaguero lo más muderno dedicau a San Miguel, ripresentau en un lienzo en lo que se bosquexa o chuizio final. D’as imáchens d’escultura d’ista puenda nomás eba dos en o templo parroquial: o cruzifixo chicot d’a sacristía y uno mayor en o coro d’estilo plateresco.

 

O 13 mayo de 1585 s’apreban por o M. J. Siñor Don Alonso Gregorio as ordinazions d’a Clofaría d’o Siñor San Chuan en l’Armita. Iste mesmo año besita la Redolada Zelipe I d’Aragón, pasando a nuei en Cosuenda, y se li rinden grans omenaches en Cariñena con dos fuens de bin, una de blanco y atra de tinto.

 

Ta 1586 s’erixe canonicamén a Clofaría d’o Santo Rosario en a Ilesia y s’alquiere a imachen d’escultura, ricamén ornamentada con manto dorau a l’estilo d’ixa puenda. O primer domingo d’Otubre s’estrena la imachen escultorica que autualmén fa onra encara la Clofaría d’o Rosario, y o Reberendo Padri Pedro Nogueras, Relixioso Dominico d’o Monesterio d’a Nuestra Siñora d’a Consolazión de Gotor, erixe a clofaría ta la que dion o suyo nombre toz os bezinos d’iste Lugar. Contemporania a l’establimiento d’ista clofaría estió la d’o Dulze Nombre de Chesús en l’Armita que nomás se conoxe por bella zita inzidental y por aber teniu dimpués una capellanía baxo a mesma albocadura.

 

En rematando iste sieglo se sustituye l’antiga Badía, a la cucha de “la Cuesta l’Amargura”, por “la Casa Retorial”, en “la Replaceta’l Cura”.

Ta 1600 se sustituye en a ilesia l’antigo altar de San Bernabé, que yera pintau en a paret, y se coloca o busto d’escultura d’o Santo. Tamién se coloca o busto de San Chuan en l’Armita. Autualmén s’alza d’antis más: as campanas, que anque fundidas repetidas bezes deben conserbar o bronze d’as premitibas, a cruz parroquial de primer clase, y la ordinaria; una casulla roya de tierzopelo labrau con belatro ornamento de menos balura, o cuadro de San Blas que se benera en l’autual ilesia, o cruzifixo chicot d’a sacristía y lo mayor colocau en a parti alta de l’altar prenzipal de l’autual ilesia, o busto de San Bernabé que agora se saca en as tronadas, lo de San Chuan de l’Armita y a Birchen d’o Rosario que benera la Clofaría, que ye la que más merito tiene dimpués d’o Cruzifixo de l’altar mayor como escultura antiga. Os demás cuadros, escultura, imáchens y alfayas pertenexen t’os sieglos XVII y XVIII.

 

Iste mesmo año asisten 2 ripresentans de Cosuenda t’a Plega d’a Comunidá de Daroca zelebrada en Paniza y en 1602 atros 2 t’a Plega d’a Comunidá de Daroca zelebrada en Cariñena.

Ta chunio de 1602 o Reutor Mosen Jerónimo Miravete, por razons de salú, debe renunziar a o suyo cargo a fabor d’o suyo sobrino Mosen Domingo Miravete, pero contina bibindo en o lugar.

Ta 1603 asiste un ripresentán de Cosuenda t’a Plega d’a Comunidá de Daroca zelebrada en Cariñena.

Ta 1609 se fa efeutiba la orden de Zelipe II d’Aragón d’espulsión de toz os aragoneses moriscos que abitan o Reino, que anque ta Cosuenda parixe estar que no l’influye demograficamén, a no ser que tomemos como propio a Abdalá de Cosuenda y a atros posibles bezins d’a relixión suya, si que l’influye economicamén, puesto que ístos sacaban d’as tierras de royal de debaxo de “la Lisalta o material buralenco con lo que dimpués treballaban en os suyos alfars en Almonazí d’a Sierra, bosando-ne y antimás aduyando en obras de construzión de casas, u d’obras mayors, como a man mudéxar que esiste en a reconstruzión d’ista torre, treballando en o campo, creyando zeicas, ezetra... Ta que sirba d’exemplo d’a esferra demografico que supuso en a Redolada nomás eba que beyer como quedón os lugars amanaus, en Alfamén quedón 3 casas, en Almonazí igual, en Longars 16, en Paniza 86, en Mezalocha s’espulsón 85, en Muel 306 y en Cariñena de 600 casas quedón 365. Iste año o país dixa d’organizar-se en Sobrecullidas y agora lo fa en Destritos, pertenexendo-mos lo de Daroca, que no baría de mugas.

 

En prenzipiando febrero de 1619 o Reutor Mosen Domingo Miravete ye nombrau Canonigo d’a S.I.M. d’a Nuestra Siñora d’o Pilar y empezipia a rexir a parroquia o Lizenziau Mosen Pablo Garzía Romeo, naxiu en Belchite entre 1590 y 1592.

Ta 1621 Don Francho de Miravete y Balaguer publica en Zaragoza o “Zertamen de San Ramón” en lo que fa onra a o suyo tío Mosen Jerónimo Miravete. Ta l’año siguién, o 2 Junio de 1622 falleze íste en Cosuenda, estando apedecau o suyo calabre en o costau dreito de l’altar mayor enta la capiella de San Blas de l’antiga ilesia metiendo-se una lapida negra con o suyo nombre. A l’edificar-se t’os finals d’o sieglo XVII a nueba ilesia parroquial se tresladón ta ísta las suyas restas, que encara retanten en o presbiterio d’a ilesia chunto a la capiella d’o Corazón de María baxo una lapida negra. Dixa en o suyo testamento 500 sueldos ta cargos y d’ellos se bosaban 25 sueldos cada año ta un mayestro de ninos, tamién dixa atros 500 sueldos ta que a suya renda se destinase toz os años ta adotar una donzella probqa filla de Cosuenda, atros 500, ta aduyar a escolans de gramatica, atros 500 ta zelebrar toz os años una fiesta ta San Cheromo, y, finalmén, propiedaz ta adotar con esplendor dos capellanías que ordinó a os suyos ereus que establiesen en ista parroquia como en efeuto las establión d’a debida traza. Un detalle singular merexe fer menzión y ye lo de que en o suyo testamento da t’os suyos ereus facultá ta modificar y rebocar as suyas disposizions y con tot y con ixo, todas ellas estión fielmén cumplidas.

 

A partir de 1630 Mosen Pablo Garzía Romeo empezipia a trazar a lo que sería la Unión. Ufierta 500 escudos t’o monezipio t’a puesta en marcha de bel tarabidau que arrebaxase a pobreza. O Conzello solizita la constituzión d’una cambra de trigo, pero anque íste no l’esfeita no li combenxe, pensando que as cambras más que remeyo de pobres son a suya perdizión. A ideya li rondaba más por tener bien emberadas as güebras, cosa que se soluzionaba con a posesión de machos. A ideya se concreta en l’establimiento d’una coperatiba de labradors que se repusiesen as mulas amortadas sin costes eszesibos, nomás bosando zinco escudos por dentrar. Comunica la suya ideya y ta beluns lis parexe bien y t’a mayoría ta emelicar-se, sobre tot t’os ricos, por lo que ricurre a o bilbilitano Chuan d’Eraso, presonache influyén en a Redolada, ta que faiga que dona atros 500 escudos, d'o mosen, si o Conzello finanziaba con atros 500.  Se parte d’un capital inizial de 1500 escudos y o mosen ba ta Balladolí an chafa 1000 escudos en 18 machos. Anque t’o prenzipio nomás s’acomodan 8, china-chana, con condizions de bose ta tres años y en tres partis iguals, s’acomodan las demás, risultando en a operazión un superábit de 300 escudos. Dimpués se dispusión os zensals como fuens d’ingresos, que yeran bels tetulos de dueda. Os intereses cheneraus por ístos conzederían a “l’unido” dica 50 escudos por macho que falleziese u 18 escudos por güei, ya que o propietario se quedaba con a carne y pelello d’iste zaguer. Ta ebitar os emparos d’as cabalgaduras por posibles deudas d’o labrador s’alcordó a propiedá d’ístas t’a Unión y l’usufruto t’o labrador.

 

Ta 1646 o Destrito de Daroca pasa a dezir-se Bereda de Daroca. Cosuenda contina en ella. A poblazión ye de 71 casas.

 

Ta 1647 Mosen Pablo García Romeo manda imprimir en os tallers de Diego Dormer “Ordinaciones de la Unión de Labradores del Lugar de Cosuenda, instituida por el Lic. Pablo García Romeo, Retor de él, y por sus Jurados, Concejo y Universidad. Dirigidas al Excelentísimo é Ilustrísimo Sr. D. Juan Cebrián, Arzobispo de Zaragoza, del Consejo de Estado de S. M., Virrey de Aragón. Zaragoza, por Diego Dormer”, en fuella de 20 paragrafos.

O 4 agosto d’iste año se fa publico instrumento d’a Instituzión y Ordinazions d’a Unión de Labradors en Cosuenda debán d’o Notario d’Auguarón, Don Pietro Ximeno, y o 10 otubre y debabán d’o mesmo Notario Siñor Ximeno l’instituyén y capetulo d’a Unión corrixión y enmendón as primers ordinazions con as adibiduras y modificazions que aconsellaba la prautica plegando dica bentigüeito as ordinazions

O 16 d’otubre 1647 empezipia a funzionar ufizialmén a “Unión” pues se zelebra la primer riunión d’os asoziaus, sobre una terzera parti d’os labradors de Cosuenda, los más probes, que aduyan a o mosen a soluzionar os problemas que iban surxindo en o proyeuto. S’alcuerdan as cantidaz de dentrada, 5 escudos por macho y 25 reyals por güei, que se feba estensible t’o conyugue pero no pas t’os ereus, que si quereban ingresar teneban que tornar a bosar a cuota t’as caballerías que eredasen. Ta ebitar problemas de manca de liquidez s’alcuerdan a imposizión de posibles rechitas en funzión d’o lumero d’animales poseyius y en rilazión 2 güeis ta un macho. O problema d’a manca de moneda, pues cuasi totas as transaizions se reyalizaban por meyo d’o truque, se soluzionó con “el Campo la Unión”, que sería labrau y culliu a ixena y asinas se iría fendo fren t’as rechitas ya que yera más fázil bosar en treballo que en diners.

 

A partir de 1649 escomenzipia a dar fruitos “la Unión” con una sobrebuena cullida. Con lo que se ba recullindo en “el Campo la Unión” se ban bosando os machos y encara sobra ta amprar zerial t’a siembra u ta atender as amenistaduras d’os labradors probes a truque de treballo. Cuan iste campo dentra en pleno funzionamiento s’abilitan tres graners cusiraus con tres claus y asinas una parti de zerial se podeba repartir entre os labradors que l’amenistasen ta sembrar, con una chicota taxa y ta tornar con fazilidaz, dos almuz por cafiz. Atra part se reserbaba ta bender y t’os labradors más amenistaus, los que iban sin macho y con una xada a treballar ta “el Campo la Unión”, 3 cafizes de limosna ta l’año. Tamién esistión problemas como os dandaleyos que apegaban los que no pertenexeban ta “la Unión” a “los Unidos” sobre os benefizios, cosa que apañó lo mosen prometendo bosar o treballo a os labradors que acudisen ta “el Campo la Unión” sin interbenir o risultau d’a cullida y metendo de parti suya dica completar a cantidá de 100 cafizes. Íste chestiona debán de l’Arzebispe de Zaragoza, Don Juan Cebrián, que se pueda treballar o campo comunitario sin desatender as obligazions relixiosas y da lizenzia ta “los Unidos” ta treballar “el Campo la Unión” en domingos y lis premia con 40 diyas d’indulchenzia. Tamién ditamina pena d’escomunión t’os que prechudiquen iste treballo lebando-se parti d’a cullida. Por exemplo ta 1649 se recullión 63 cafizes de trigo en “el Campo la Unión”, por lo que o mosen teneba que entregar 37, pero puyó a suya alportazión dica 50, t’o que o conzello respondió con atros 25. Isto animó a lumerosos labradors que encara no yeran parti de “la Unión”, que solizitón a dentrada suya y se lis conzedió con l’alportazión de dos meyas de trigo por presona.

 

Ta 1654 se publica, impreso en os talleres de Diego Dormer y costando 5000 escudos, o “Tratado de la execución de la unión, tesoro y reparo de Labradores del Lugar de Cosuenda. Dedicado al Supremo Hacedor de todas las cosas, Dios, y á su Divina Providencia. Zaragoza, por Diego Dormer”, en cuarteta, con a ideya de promober a suya estensión por tot o reino. En íste dize que os prenzipals cargos son os mayordomos encargaus d’o cobro y almenistrazión de rendas y que yeran eslexius anualmén por Asambleya Cheneral os días de Nadal y Año Nuebo, entregando as cuentas y sin poder tornar a salir en 10 años. As tres claus de l’Archibo quedaban una en poder d’os mayordomos, atra en poder d’o Churado Mayor d’o Lugar y l’atra en poder d’o Reutor d’a Parroquia, teniendo-se que chuntar obligatoriamén os tres ta ubrir-lo. Atra condizión diziba que en caso de rematar “la Unión” a metá d’o capetal se reserbase ta misas ta l’alma suya y l’atra metá t’os probes d’o Lugar, y tamién dize que anque nomás ese una presona interesada en a continidá de “la Unión”, bastase por sí solo y se quedase con tot l’intrés de “la Unión”. Cada macho tendría que treballar una determinada estensión de zerial en l’albala, 6 “jubadas” u chubadas de 4 “rejas” o labors anuales, cada güei 3 “jubadas” de 4 “rejas”. En caso de no disponer d’ixa superfizie se podría completar a razón de 1200 zepas por ”jubada” de 3 “rejas”.

 

O 17 chinero y o 3 de febrero de l’año 1669 Mosen Pablo García Romeo y “los unidos” rebocan as premitibas ordinazions y establen atras quinze nuebas que quedan bixens, seguntes l’instrumento atorgau debán d’o Notario d’Auguarón Don A. Padules.

 

O 3 d’agosto 1672 falleze en Cosuenda o Reutor Mosen Pablo García Romeo, dimpués de aber rezibiu os Sacramentos d’a Penitenzia y d’a Estremauntura, pero no lo Santo Biatico, a l’impedir-lo los gomecos d’a suya zaguera anfermedá. As suyas restas estión lebadas ta l’Armita San Chuan en la que rezibión sepultura. No se tiene notizias de que d’ixe puesto aigan estau esumaus, y por consiguién, se i debión quedar cuan l’Armita se transformó en garchola y torils, e i son ta diya de güei combertius en polbo. Millor unor debeban aber precurau os cosuendanos d’o sieglo XIX t’as suyas restas mortals que la de estar pateyadas por os toros con los que o Lugar se dibierte. Anque los d’o sieglo XVIII fundón un cabo d’año por l’alma suya costeyau por “la Unión de Labradores”.

O 2 de febrero 1673 toma posesión d’a Reutoría de Cosuenda Mosen José Torres Busal.

 

O 7 d’agosto 1674 se da o suzeso de “la Forma Perdida”. Reproduzimos una cronica d’ixe tiempo “Á pocos anyos que estaba Rector el Dr. Torres baxaban el Viatico de la Yglesia antigua, el día ocho de agosto, digo día siete de agosto de 1.674, para comulgar acá baxo á Ygnacio Lescano, quién murió á el otro día ocho, baxaban el globo con dos formas; la una, para el enfermo; la otra, para la adoración del pueblo: E aquí que se levanta una tempestad furiosa de aire, que las varas del palio hirieron á el Sacerdote en la cabeza. El Sacerdote levantó la mano derecha sobre la capita y cubierta del vaso, o globo, el viento descubre el vaso; arrebata la una Forma. Estubo perdida hasta el otro día. Púsose en penitencia todo el pueblo y buscó con lágrimas á su Dios perdido, hallole un niño hijo d'algo. Y en acción de gracias se hace la fiesta todos los años como el día del Corpus; el Señor hizo un potente sermón y procesión” que sennifica “T’os pocos años que yera Reutor o Dr. Torres baxaban o Biatico d’a Ilesia antiga, o diya güeito d’agosto, digo diya siet d’agosto de 1.674, ta comulgar astí baxo á Ygnacio Lescano, qui murió l’atro diya güeito, baxaban o globo con dos formas; la una, ta l’anfermo; l’atra, ta l’adorazión d’o Lugar: E aquí que se debanta un andalozio d’aire, que as baras d’o palio ferión a o Mosen en a capeza. O Mosen debantó a man dreta sobre a capita y cubierta d’o baso, u globo, l’aire descubre o baso; furta una Forma. Estió tresbatida dica l’atro diya. Se metió en penitenzia tot o Lugar y rechiró con glarimas a o suyo Dios trebatiu, lo trobó un nino fidalgo. Y en aizión de grazias se fa la fiesta toz os años como o diya d’o Corpus; o Señor fizo un potén sermón y prozesión”. De traza parexida se refiere t’o feito a losa de “el Peirón de la Forma Perdida”, situgau an se trobó, metendo, antimás, o nombre d’o niño que la trobó, José Vallés, de seis años d’edá. Quizau íste estiese o detonán ta planteyar-se en serio a construzión d’a nueba ilesia, ya que, por a esplosión demografica que eba supuesto “La Unión”, o Lugar eba cruzau ta l’atro costau d’o río.

 

Ta 1675 asiste 1 ripresentán de Cosuenda t’a Plega d’a Comunidá d’Aldeyas de Daroca zelebrada en Cariñena.

Ta l’año 1676, seguntes a Ordenanza d’a Comunidá d’Aldeyas de Daroca, s’achustan os pesos y midas con los d’a zidá de Zaragoza, baxo pena d’infrazión de 60 sueldos. A unidá de longaria yera la bara (0,772 m.), que se trestallaba en 4 palmos (0,193 m.) u en 3 terzias (0,257 m.). A unidá de peso yera la roba (12600 g.), que se trestallaba en 36 libras (350 g., l’autual “cuarto y metá”). A libra se trestallaba en 12 onzas (29,16 g.) y a onza en 16 adarmes u arienzos (1,8 g.). A unidá de capazidá en os aridos yera o cafiz, que se trestayaba en 8 meyas, y a meya en 12 almuz. Tamién yera la fanega, que se trestallaba en 4 cuartals, y el cuartal en 4 cuartillas. O zeite se midía en robas (13,93 l.), que se trestallaba en 36 libras (0,39 l.). L’auguardién se midía tamién en robas (13,33 l.), que se trestallaba en 36 libras (0,37 l.). Y o bin en alquezes u nietros (118,92 l.), que se trestallaba en 12 cantaros (9,91 l.), y o cantaro en 16 cuartillos (0,62 l.)

 

Ta 1681 s’empezipia la construzión d’a nueba ilesia, metiendo Mosen José Torres Busal 1000 libras chaquesas y aduyando los bezins. O 15 d’abiento 1686 se bendize o nuebo templo y se tresladan os azesorios d’a Ilesia antiga ta la nueba. Concorren ta iste auto los benefiziaus y bezins de Cosuenda, os Capetulos eclesiasticos d’Auguarón y d’Almonazí d’a Sierra y atros muitos mosens, os conzellos d’ambas billas y muitos d’os suyos moradors. (Ta beyer o Plano toristico d'a Ilesia pulsia astí). (Bersión orixinal en castellán)

 

Mosen José Torres Busal debe meter 500 libras chaquesas más ta beyer construyiu o nuebo templo por os suyos dos defeutos: 1. Abió que rebistir de ladriello os suyos muros de tierra y 2. A l'estar debantau chunto a o río, se fizo amenistable tota una esfensa de tapial que librase a o templo de posibles garonas, enzete d'a canalizazión d'o río, que por deseparar o Lugar en dos obligó a la construzión d'os dos primers puens, lo de "la Plaza", piatonal, muito diferén de cómo lo conoxemos agora, y lo de "la Fuente", ta caballerías y carros. 

 

Iste templo no yera tan completo como lo conoxemos güei porque a torre yera un simplo campanario situgau a l'altaria d'an agora ye o reloch, mancaba d'as capiellas de San Chuan, San Bernabé y o Santismo Cristo, que estió construyidas en o sieglo siguién, pero ya teneba las suyas tres nabadas cubiertas por reboltons de cañón, o suyo cruzero coronau por a cupula y o suyo orgán, que debió d'estar lo mesmo d'a ilesia antiga, adibindo-li l'aflautau.

 

Tamién mancaban encara os retablos y nomás ebía en o presbiterio una mesa altar con o suyo Sagrario y o Cruzifixo gran que encara esiste en a parti alta de l'altar mayor, estando lo mesmo que eba en a Ilesia Antiga, pues as suyas trazas escultoricas lo fan anterior a o sieglo XVII, semellando d'os sieglos  XIV u XV. A organizazión d'os altars estió: En o costau de l'Ebanchelio, o puesto que agora ocupa l'altar de San Ramón, San Bernabé, y a l'atro costau, an agora ye San Antonio de Padua, San Chuan de l'Armita, trayiu d'o templo suyo, por lo que supuestamén s'albandonan tanto a Ilesia Antiga u Alta como l'Armita de San Chuan en fabor d'o nuebo templo.

 

O 2 de octubre 1696 Mosen José Torres Busal dixa la Parroquia de Cosuenda en benefizio de la de San Pablo de Zaragoza, dixando 400 libras chaquesas t'a construzión de l'Altar Mayor d'a nueba ilesia. Ocupa o suyo puesto lo sobrino suyo Mosen Juan Bautista Busal, ta qui debemos parti d'a nuestra istoria por o suyo zelo y orden en l'Archibo Parroquial. O 19 marzo de 1697 Mosen Juan Bautista Busal zelebra la suya primer misa como Reutor.

 

T'os prenzipios d'o sieglo XVIII se reyaliza o Retablo de l'Altar Mayor colocando en o suyo zentro a Reina d'os Ánchels, tetular d'a Parroquia, a os costaus as imáchens de San Pietro y San Pablo, en a parti alta l'antiguo cruzifixo y denzima d'os telladez d'as cuatro colunnas as estatuas d'os cuatro ebanchelistas. Tamién se fizón os dos nuebos altars, uno ta San Bernabé, que no eba más imachen que o busto baxau d'a Ilesia Antiga, que encara se saca en as tronadas, y que yera colocau en un altar probisional, donde agora ye San Ramón, anque sin o segundo cuerpo que ocupa o cuadro de Santa Luzía, y atro ta San Chuan de l'Armita, con o busto que yera en a suya Armita, donde agora está San Antonio de Padua, y que tampó no teneba o cuadro d'a Inmaculada, adibiu posteriormén.

 

As imáchens yeran las que autugalmén están en as colunnas. Costón istos altars 500 libras chaquesas cadaguno, estando costiau lo de San Chuan por a Reutoría, y lo de San Bernabé, anque cosa consta, debió ser costiau por os churados y o Lugar. Asinas se consiguión fer as esculturas de cuerpo entero y tallar y dorar ricamén os altars, colocando-los en os testers d'o cruzero y plenando asinas os dos foraus prenzipals.

 

O estau d'o Lugar en istos años yera esplendoroso. Bi eba bellas 250 casas, que ya se estendillaban omoxeniamén t'os dos costaus d'o Río. "La Unión de Labradores" lebaba una bida puxán pues bi yeran inscritos toz os labradors, y antimás d'estar aseguradas os dezigüeito machos mercaus por o Rector Romeo, bi yeran totas as d'o Lugar, antimás d'os güeis. Ta un tañiu espezial de campana en diyas determinaus acudiban "los unidos" a treballar os campos d'a Soziedá. Qui no acudiba bosaba diez reyals de multa y qui promobeba bel estrapaluzio bente. Toz os años asistiban "los unidos" a la fiesta de San Antón, y dimpués d'a fiesta se zelebraba la chunta cheneral, de la que os mayordomos presentaban as cuentas de l'año anterior y se nombraban os cargos ta l'año siguién.

 

En l'orden relixioso, a o Reutor se li bosaba o “diezmo”, a dezena parti de toz os fruitos, que lo d'os zerials se bosaba en as mesmas eras, lo d'o zeite en o molín, y los que eban bendiu as olibas lo bosaban en diners, y lo d'as ugas debeban lebar-lo os cullidors t'os mesmos trullars d'a Reutoría, abonando lo Reutor un diner por cada carga, lo que podeba lebar una caballería, autugalmén normalizau en 100 qg., como gratificazión por lebar-se-la. Dimpués toz os  3 de mayo se lebaban os ganados ta "la Casa Lugar" ta eslexir o “diezmo”, que una bez eslexiu yera costumbre que o Reutor conbidase a os cullidors. D'iste “diezmo” lo Reutor bosaba la cuarta parti a l'Arzebispe de Zaragoza y as atras tres cuartas partis pasaban ta engrosar as pertenenzias d'a Reutoría, anque a dezena de corders y zeite li pertenexeba por completo, antimás de tener as ofrendas de zera y pan en os apedecamientos, y "la renta de la primicia”, que almenistraban os Churados baxo a bexilanzia d'o Reutor, y con la que s'atendeba a bosar a o Sacristán y os gastos d'o Culto. A Reutoría la componeban o Reutor y tres benefiziaus, uno que desembolicaba la capellanía de San Miguel, zelebrando tres misas semanals en o suyo altar, y dos que desembolicaban as capellanías de Miravete, zelebrando dos misas semanals en l'altar de San Blas. Ista Capellanía teneba tamién as suyas zincas y rendas propias.

 

Ta 1700 muere sin deszendenzia Carlos II d'Aragón. Se desencadena una luita por a suzesión d'a Corona que dibide a o país pues por una parte, los más, son a fabor de Carlos d'Austria y por atra, los menos de Zelipe de Borbón. Se desencadenan fuertes barallas en os arredols y o Reutor pide a os cosuendans que no interbengan. Agún asinas os exerzitos toman muitas bezes caballerías, se produzen furtos, ezetra... O país s'empezipia a decantar más por Carlos d'Austria, que chura os fueros, pero Zelipe de Borbón da un grandismo golpe d'efeuto en a baralla d'Almansa y se corona rei ta 1707. 

 

Cosuenda dica l'adibidura en o Reino d’Aragón (Dica 1119)

 Cosuenda en o Estau Español Muderno (1707-1936)

 

 

TORNAR

 

Ir-ne t'a bersión orixinal