Empezipiamos ista ruta d'a Industria remerando que si tiene iste nombre ye porque mos lebará a conoxer, antimás d'atras cosas, parti d'os edifizios y bodegas que se construyon t'os finals d'o sieglo XIX cuan a filocsera atacó los biñers franzeses y o mercau d'ixe país se tubo que amanir de lugars como lo nuestro, crexendo lo lugar sobre tot en bodegas, pero tamién en bellas casas y serbizios. Tamién aprofeitaremos ta beyer lo que mos resta. (Pulsia astí ta beyer o Plano toristico de Cosuenda) (Bersión orixinal en castellán)
Como en as atras rutas mos situgamos en “la Plaza’l Mercáu” [1], ufizialmén Plaza de España y que como ya emos dito en as atras rutas empezipió estando un chicot fosal meyebal, “el Fosal de San Juan” y dimpués estió urbanizada sobre o sieglo XVI ta mercau a l'aire libre y como puesto de execuzions publicas. Astí mos trobamos l'antiga posada, d'o sieglo XVI, y bel ráfel tradizional en as casas, antimás de poder-mos prexinar do agora se troba “la Casa Lugar”, l'edifizio amariello que fa de siede d'o Conzello, l'antiga armita San Chuan que ya en os años que comprende a nuestra ruta yera en decadenzia, pues eba estada desamortizada ta 1836.
Tamién tenemos os muros d'esfensa d'o río con os alazez orichinals d'os finals d'o sieglo XVII, no asinas o tapial, escatumbau barias bezes por o río, y un chicot puen piatonal, “el Puente la Plaza”, racada de lo primero, d'os finals d'o sieglo XVII tamién.
Asinas que mos amanamos ta “la Casa Lugar” y empezipiamos a puyar por “la Carrera Auguarón”, dentrando en “el Rabal de Carrauguarón”, antis conoxiu como de San Juan, y podemos ir metendo ficazio mientres puyamos, t'a man cucha, en os soportals de bellas casas y os rafels.
Cuan plegamos ta un cruze en Y cullimos la d'a cucha, “la Carrera la Lisalta”, ufizialmén Calle Iglesia Alta, y continamos puyando china-chana y dentrando en a zona d'as bodegas, dica que llegamos ta un punto ta lo que confluyen muitas carreras, “el Parque” [2], an t'a dreita ya empezipian a beyer-se as tipicas espelungas de Cosuenda escabadas baxo tierra.
Da-mos meya buelta y tornamos una miaja por do emos beniu cullindo a escape “la Carrera los Embases”, que mos sale t'a man cucha. Astí si que somos ya en plena zona de bodegas, y d'industria, pues si ista carrera tiene iste nombre ye por a fabrica de “embases” metalicos, embasadors, que se i trobaba.
Mientres la caminamos podemos ir alufrando bella d'as espelungas que mos salen a o paso y bi ha una espezialmén que la desepara d'a carrera un rellau que fa de puerta, podendo d'ista traza dixar beyer a o peteniador como ye por aíntro.
Una miaja entabán, t'a cucha, tenemos a espelunga [3], dentro de l'edifizio franquiau por un polido soportal, an as “Bodegas Tejero”, las más antigas d'Aragón que encara funzionan, almazenaban y abiellaban os suyos bins.
Continamos entre bodegas dica plegar ta atro cruze a lo que azeden barias carreras, do bi ha un cartel de l'“eje de Comunicación de la Sierra de Algairén” y que tiene una replazeta t'a cucha que da dentrada ta “la bodega los Moros” [4]. Como dato refitolero, ista bodega se combirtió mientres bels días, ta marzo 1995, en un repoliu bar escabau baxo tierra, ya que o direutor de zine Julio Medem i tomó barias secuenzias t'a suya pelicula “Tierra”.
Tornaremos sobre os pasos nuestros cullindo a escape a costera que mos sale t'a dreita, “la Cuesta’l Retor”, que tiene iste nombre porque la mandó fer t'os meyaus d'o sieglo XVII o Reutor de Cosuenda d'ixe tiempo Mosen Pablo Romeo ta que os carros podesen puyar sin periglo ent'as nuebas tierras que se empezipiaban a cautibar en “la Unión”.
Mientres puyamos podemos ir beyendo diferens edificazions d'o sieglo XIX con as suyas bodegas, con bel soportal y ráfel tradizional, e imos tamién redolando t'a cucha la parti alta de “las bodegas Tejero” dica que un gran edifizio [5], os trullars d'istas bodegas, mos sale debán tenendo que redolar-lo por a cucha.
Podemos ir apreziando as ambiestas que mos amanexen d'o Lugar.
Tamién de “la Lisalta” y de parti de l'albala agora que ya la costera mos dixa respirar una miaja.
Mientres imos chirando ent'a dreita, siempre redolando los trulars de “las bodegas Tejero”, dica que plegamos ta un chicot edifizio que feba de bascula [6], primer trango d'as ugas antis de dentrar en os trullars d'ista bodega.
Continaremos por o camín engudronau caminando entre biñas, t'a cucha, y pins, t'a dreita, tenendo muito cudiau con o Zierzo, si sofla, pues dentramos en a parti d'as bodegas que nusatros dizimos “Buenos Aires”.
Ixas chicotas piramides de mampostería que mos salen a o camín se dizen “lumbreras” y son respiraderos que tienen as bodegas que se troban baxo lo camín, sirbindo ta “joriar el bino”, renobar l'ocsixeno que bi ha dentro d'a bodega, os diyas que sofla o Zierzo.
Mientres caminamos podemos beyer t'a dreita o Lugar y una polida ambiesta d'a Sierra Algairén y t'a cucha diferens albalas de campos: “la Zelada”, “Zagalzerro” y “la Rebollosa”, y t'o final d'o camín “la Plana” y “Carrauguarón”, que ye cuan plegamos ta un cruze [7] y cullimos a carrera d'a dreita, empezipiando a baxar.
Continamos o deszenso entre bella casa espaldada y más bodegas, alufrando l'arquiteutura tradizional d'ellas y podendo-mos amanar ta una que tiene a puerta de baroz y mos dixa beyer o suyo interior.
D'ista traza plegamos atra bez t'o cruze do ye “la Bodega los Moros” [4] cullindo agora la primera d'a cucha, por “la Paretera”, ufizialmén Calle de la Diputación Provincial de Zaragoza, dica que plegamos ta atro cruze [8], podendo continar reuto ta beyer bella bodega de traza tradizional más.
Por iste cruze, rezenta la lienda, que os diyas de fredo y nieu cuan se fa de nueis s'aparixen, cuan camina uno solenco, dos chicotas ninas bistidas de blanco, que dizen estar chirmanas y tener muito fredo, y que piden por fabor a qui se troban que lis lebe t'a casa suya ta acubillar-se d'o burz, pues ellas se troban tresbatidas, disparixendo a l'inte que íste se torna ta ubrir a puerta d'a casa suya. A berdá que dica 1998, año en que s'esfaltó a carrera, encara se podeban beyer, a o pie d'a puerta d'una bodega d'una miaja más alto [9], dos chicotas losetas con o nombre de dos chirmanas.
Dixamos as lieendas y en o cruze continamos por “la Paretera”, agora Calle Escuelas, dixando l'edifizio d'ístas, d'os meyaus d'o sieglo XX, ta cucha.
Una miaja más ta baxo un chicot parque con una bascula de fierro [10] mos remera la edificazión, espaldada ta 1998, que feba de bascula antis de dentrar en atros trullars de “las Bodegas Tejero”, ya que a suya siede yera en o conchunto d'edifizios d'a dreita y an antimás de trullars, feba d'alcolera ya por o sieglo XVIII.
Iste conchunto d'edifizios lo conoxemos como “la Fabrica”.
Si fuésenos por o camín d'a cucha en 7 minutos plegaríamos ta “el Parque de la Fontanilla” do podemos fer un mueso si ye menister y refrescar-mos con as suyas auguas.
Cruzaremos o río por “el Puente’l Río Alto” do mos sale t'a cucha “la Casa Zipriano” [11], refitolero puesto an tenemos inlumerables trastes de treballo tradizionals espuestos como si mos trobásenos en un museu etnoloxico y nomás pasar ista casa mos sale t'a cucha una carrera que mos leba en un par de minutos ta “el Parque del Río Alto”, do tamién podemos fer un mueso si no lo emos feito en “la Fontanilla”.
A o piet d'iste cruze tenemos un edifizio de nueba construzión que pertenexe ta “Grandes Vinos y Viñedos”, que ye una soziedá compuesta entre barias Bodegas Cooperatibas d'a Redolada y atros sozios, y do se suelen abiellar en pipa bels bins.
Debán ye o conchunto d'edifizios que yeran “la Bodega Cooperatiba de San Bernabé” [12], establida ta 1955 y restablida ta 1997 con atras cooperatibas en “Grandes Vinos y Viñedos”. Bi ye do agora se conzentra cuasi tota la produzión de bins de Cosuenda, y si redolamos l'edifizio dica la suya dentrada, chirando t'a dreita, podremos tastar u mercar, si ye ubierta la bodega, os diferens produtos binicolas que ufre o nuestro Lugar, como l'afamada “Pajarilla”.
Dimpués d'ísto, y con a capeza esbarrasada, tenemos que tornar atra bez dica “el Puente’l Río Alto” y empezipiar a baxar por “el Paseo”, t'a man cucha, ufizialmén Paseo de los Plátanos.
A escape mos trobaremos t'a dreita la dentrada prenzipal de “la Fabrica” [13] con dos carauteristicos bancos a o costau d'a puerta, podendo apreziar o ráfel de o suyo tellau. Ta l'atro costau tenemos o río y un güerto, debaxo d'a Cooperatiba.
Una miaja más ta baxo mos sale ”la Fragua” [14], do encara podemos almirar a construzión y treballo d'o fierro de traza tradizional, y bella casa tipo de metá d'o sieglo XX y ta l'atro costau d'o río un chicot bosque d'urmos secos que amaga os ronals d'o molín de farina de Cosuenda.
Continando plegamos t'o Zentro Zebico “la Unión” [15], que cuenta con bar, pabellón, pistas esportibas y piszinas, y debán tenemos “la Pirra”, atro chicot güerto.
D'ista traza mos metemos en “el Rabal de la Fuente Nueba” [16], d'o sieglo XIX, y que se dize asinas porque si paramos cuenta baxo as escaleras d'o Zentro Zebico “la Unión” bi ha unas chicotas bocas d'augua. Se i trobaba, dica que as suzesibas reformas de 1989, 1995 y 2001 cuasi l'han enterrau, “la Fuente Nueba” dimpués conoxida como “l’Abrebadero” porque a salinidá d'as suyas auguas nomás premitiba beber que a os animals.
En iste “Rabal” encara beyeremos bella casa carauteristica y tamién bel ráfel tradizional mientres pasamos a o costau d'o reformau “Puente la Fuente”, d'o sieglo XVII, y plegamos ta l'altaria de “la Casa Lugar” [1], reconstruyida ta 1986, que en o tiempo que mos comprende ista ruta ya eba dixau de estar armita, tenemos a suya esplanicadura en a ruta de "la Unión", y s'eba combertiu en garchola, escuelas, torils y, de zaguero en “la Casa Lugar”, prenzipio y remate d'ista ruta.