Iste recorriu mos lebará a conoxer a parti más antiga d’o lugar, cosa que ye difízil d’apreziar por as continas reformas que han endurau as casas mientres o tiempo pero encara quedan detalles que mos pueden abstrayer t’os tiempos meyebals, tiempos que en o nuestro Lugar empezipian ta l’año 1363, anque a nuestra primer decumentazión data de 1142. Estará difízil trobar racadas anteriors ta ixe año pues o Lugar estió estricallau de raso por a imbasión de Castiella y abió que reconstruir-lo. (Pulsia astí ta beyer o Plano toristico de Cosuenda) (Bersión orixinal en castellán)
Asinas que enzetamos o nuestro camín en “la Plaza’l Mercau” (Plaza de España) [1], antis más “Fosal de San Juan” y urbanizada en o sieglo XVI t’o mercau a l’aire libre y t’as execuzions publicas, estando iste puesto más amplo y cabendo muita chen.
En ella podemos apreziar l’antiga posada y bel ráfel tradizional en as casas, antimás de poder-mos prexinar an agora se troba “la Casa Lugar”, l’edifizio amariello, l’antiga armita San Chuan, edifizio restaurau ta 1986, y que, anque agora no tienga muita balura arquiteutonico, si que en tiene prou istorica ta nusatros.
Ista armita s’allenó a la Reutoría de Cosuenda en a Desamortizazión de Mendizábal de 1836, pasando a estar garchola, escuelas, torils y, de zaguero, siede d’o Conzello. As parez d’ista armita yeran prou simplas y las remataba un chicot zimbalet que yera denzima d’a puerta. Dentro teneba tres altars: lo zentral, adedicau ta San Cuan Ebanchelista, de lienzo, lo d’o costau de l’epistola, con una imachen d’a Nuestra Siñora, d’escultura dorada, y ta l’atro costau un cuadro sobre tabla ripresentando a Santa Ana y una escultura de San Colás. En iste puesto se supone que continan as restas de Mosen Pablo Romeo, promotor de “El Tratado de la Unión”, pues estió apedecau en ista armita o 3 d’otubre 1672.
D’as dos carreras que i puyan eslexiremos la que mete
Calle Trévedes, que en breus mos dixa en “la Plazuela las Estrebedes” [2],
majiza plaza an encara tenemos un carauteristico soportal tradizional, de meyo
punto, y una antiga loseta de zeramica con o nombre d’a plaza.
D’astí y entalto, a partir d’agora bi ha que pretar-se
bien o calzero pues puyaremos un desnibel de 40 metros, entramos en o rezinto
meyebal propiamén dito por “la Calle l’Orno”, ta man cucha se trobaba
l’antigo furno, y en bels metros plegaremos a “la Replazeta’l Cura” [3], ta man
cucha, an encara podemos apreziar, pero muito transformada, l’antiga “Casa
Retorial”, ye dizir, an se trobaba o Capetulo Eclesiastico de Cosuenda y se
bosaban os diezmos, se dixaba o bin en os trullars, ezetra...
Puyaremos por “la Cuesta la Retoría” (Calle Rectoría), do tenemos bel ráfel tradizional, y plegando t’o cruze de carreras dentramos en “el Rabal de la Serreta” [4]. En o estreito que ba en plano [5] tenemos barias casas tradizionals y beluna d’ellas con o soportal tradizional. En una d’istas casas, rezenta la lienda, que cuan ta 1833 o Cheneral carlista Conesa controlaba Cosuenda, los no partidarios d’ístos, que lis rechiraban ta apercazar-los, s’amagón en os suyos pasadizos sin estar trobaus, salbando d’ista traza la bida.
Desandamos bels pasos y continamos puyando ta man cucha por a primer (Calle Serreta Alta), an si a pendién mos dixa podemos empezipiar a almirar as ambiestas d’o lugar, ta un costau, y d’o Castiello, ta l’atro, antimás de bella bodega que sale t’o paso nuestro.
Cuan plegamos ta un cruze de camins [6], continamos por lo d’a dreita, que puya encalaxonau por un antigo foso d’esfensa d’o Castiello combertiu en camín, por do podemos apreziar bels chicoz foraus debaxo d’a muralla que dizen as liendas de tradizión popular que yeran parti d’os antigos tónels que esistiban por debaxo d’o Castiello y que se comunicaban con bellas casas, plegando encluso dica “la Caseta las Brujas”, a o costau d’o río.
Continamos dica que l’altaria que ha ganau mos dixa entre “la Torre la Lisalta” y “el Peirón de la Forma Perdida” [7].
D’astí continaremos por un chicot sendero que sale ta
man dreita y en bels metros mos dixa en lo que yera o Castiello Cosuenda [8].
Iste castiello parixe ser que estió mandau reedificar, l’anterior eba estau estricallau en a imbasión de Castiella de 1363, por qui yera en ixe tiempo l’Arzebispe de Zaragoza Garzía Fernández d’Eredia t’os finals d’o sieglo XIV, anque bels istoriadors lo datan d’o sieglo XV. A l’estar de reximen eclesiastico s’organizaba en dos partis, o cubillar, t’o norte, y a ilesia t’o sur, serbindo lo cubillar ta ospedache d’esdebenideras besitas de l’Arzebispe y a ilesia t’a recullidura d’os nuestros debampasaus.
D’iste conchunto mos queda “la Lisalta”, antiga torre d’a iglesia de traza gotica-toledana, gotica por os suyos bentanos cheminaus, que tanto carauterizón as obras apadrinadas por iste Arzebispe, y toledana por a mezcla d’a obra de mampostería con ladriello, y con detalle mudéxar denzima d’os suyos bentanos, situgada en un punto estratexico, puesto que dende o suyo remate se puede dibisar cuasi tota l’albala sin estar bisto. En ella eba dos campanas y dos zimbalez, antimás d’atro zimbalet más chicot colocau en un bentano d’o coro d’a Ilesia. Dentrando en o rezinto d’ísta se podeban beyer cuatro altars: T’a cucha lo San Blas, pintau sobre lienzo. En o zentro yera l’Altar Mayor, adedicau ta María Santisma y teneba un chicot retablo de fusta adrezau por cuatro colunnas torniadas y dos ánchels que lebaban os atributos d’a pasión, antimás d’un lienzo pintau en a suya parti zentral y d’o cruzifixo que agora preside l’Altar Mayor d’a Ilesia.
Dimpués bi yera l’altar de San Bernabé, con un cuadro d’o patrón de Cosuenda, d’o sieglo XVI, y de zaguero lo San Miguel, ripresentau tamién con un lienzo de l’Arcánchel omonimo, tamién d’o sieglo XVI.
Antimás bi eba un chicot cruzifixo de plata d’o sieglo XV. Ista ilesia tubo plena bixenzia t’o culto dica os finals d’o sieglo XVII, que se fizo a Ilesia d’abaxo.
Tamién, si mos damos una buelta por a meseta que ye a torre podremos apreziar as restas de tapial que conformaban o rezinto d’o castiello y d’a ilesia, que anque muito esferraus, pueden fer-mos una ideya d’a bida en ixos tiempos.
Iste conchjunto se desamortizó ta 1836 por 9500 reyals y agora ye de propiedá pribada.
Tornamos t’a zaga dica “el Peirón de la Forma Perdida” [7], que mos rezenta una falordia d’a segunda metá d’o sieglo XVII en una loseta, que estió a purna ta baxar a ilesia.
Reproduzimos d’as cronicas d’ixe tiempo:
“Á pocos anyos que estaba
Rector el Dr. Torres baxaban el Viatico de la Yglesia antigua, el día ocho de
agosto, digo día siete de agosto de 1.674, para comulgar acá baxo á Ygnacio
Lescano, quién murió á el otro día ocho, baxaban el globo con dos formas; la
una, para el enfermo; la otra, para la adoración del pueblo: E aquí que se
levanta una tempestad furiosa de aire, que las varas del palio hirieron á el
Sacerdote en la cabeza. El Sacerdote levantó la mano derecha sobre la capita y
cubierta del vaso, o globo, el viento descubre el vaso; arrebata la una Forma.
Estubo perdida hasta el otro día. Púsose en penitencia todo el pueblo y buscó
con lágrimas á su Dios perdido, hallole un niño hijo d'algo. Y en acción de
gracias se hace la fiesta todos los años como el día del Corpus; el Señor hizo
un potente sermón y procesión”. que
sennifica “T’os pocos años que yera Reutor o Dr. Torres baxaban o Biatico d’a
Ilesia antiga, o diya güeito d’agosto, digo diya siet d’agosto de 1.674, ta comulgar
astí baxo á Ygnacio Lescano, qui murió l’atro diya güeito, baxaban o globo con
dos formas; la una, ta l’anfermo; l’atra, ta l’adorazión d’o Lugar: E aquí que
se debanta un andalozio d’aire, que as baras d’o palio ferión a o Mosen en a
capeza. O Mosen debantó a man dreta sobre a capita y cubierta d’o baso, u
globo, l’aire descubre o baso; furta una Forma. Estió tresbatida dica l’atro
diya. Se metió en penitenzia tot o Lugar y rechiró con glarimas a o suyo Dios
trebatiu, lo trobó un nino fidalgo. Y en aizión de grazias se fa la fiesta toz
os años como lo diya d’o Corpus; o Señor fizo un potén sermón y prozesión”. Alto
u baxo, ye lo que tamién mete en a loseta, adibindo lo nombre d’o nino que la
trobó, José Vallés, de 6 años d’edá.
De “el Peirón de la Forma Perdida” baxaremos, ta man dreita, por un chicot camin, que mos leba por bellas bodegas y casas espaldadas, dica plegar a una replazeta y chuntar-mos con “la Cuesta’l Fosal” (Calle Cementerio) [9]. Baxaremos la cuesta una miaja dica que mos sale una chicota carrera ta man dreita que culliremos y mos lebará dica “el Bico l’Amargura” [10], do podemos apreziar o conchunto d’as casas en sí, muito esferrau, pero que encara conserba la orixinalidá y bel elemento tradizional que carauterizó a o lugar, como un soportal de meyo punto que bi ha.
Tamién i tenemos una chicota loseta que mos informa d’o lumero.
D’astí enta baxo ta man cucha por “la Cuesta l’Amargura”
(Calle de la Amargura) dica o siguién cruze [11], zentro neuralxico d’a
Cosuenda Meyebal puesto que se i trobaba la badía, edifizio muito transformau
ta baxo t’a dreita, que rexiba os destins d’o lugar y que dimpués se baxó ta
“la Retoría”.
Continamos t’a cucha, puyando una chicota costera y cuan
empeziamos a baxar chiramos t’a dreita. Estamos en “la Cuesta los Narros”
(Calle Narros) [12], florida costera, o cuyo nombre mos reboca t’a repoblazión
meyebal que tubo iste lugar cuan se trobaba en a estremadura aragonesa, y que
encara en podemos apreziar bel ráfel tradizional mientres la baxamos.
T’o plegar ta baxo, t’o cruze, continamos t’a dreita por “la Calle Nueba” (Calle Nueva) [13], carrera ubierta en o sieglo XVI, que allora estaría nueba, an antimás de barios ráfels tradizionals tenemos un par de soportals dinnos de nombrar, uno d’ellos con uno d’os pocos detalles mudéxars que encara alzamos, anque por a ruina d'o suyo edifizio, autualmén se troba menazau por a "piqueta".
Nomás mos queda plegar ta “la Calle l’Orno”, ta man cucha, y desandar por “la Plazuela las Estrebedes” [2] dica plegar t’o nuestro punto de salida, “la Plaza’l Mercau” [1].